Бишкек шаарынын мэри жергиликтүү тургундар менен жолугушуусун улантууда
Кезектеги жолугушуу кече К.Карасаев атындагы Бишкек мамлекеттик университетинде Ленин районунун тургундары менен өттү. Иш-чарага 350дөн ашык тургун катышып, алар менен баарлашуу 8 сааттан ашык убакытка созулду.
Мэриянын басма сөз кызматынын маалыматына караганда, жолугушууда тургундар жер тилкелерин мыйзамдаштыруу, жолдорду куруу жана оңдоо, коомдук транспорт, канализация, кызыл сызыктар, башаламан соода, сейил бактарды жакшыртуу жана социалдык объектилерди куруу маселелерин көтөрүштү.
Айрыкча Фучик жана Лев Толстой көчөлөрүнүн кесилишиндеги жол өтмөгүн курууга өзгөчө көңүл бурулуп, муниципалитеттин өкүлдөрү ишти 2026-2027-жылдары бүтүрүү пландалып жатканын билдиришти.
Ошондой эле тургундарды Ош базары көчүрүлгөндөн кийинки келечеги эмне болоору да кызыктырды. Ага ылайык, Ленин районунун акими мурдагы базардын ордунда тургундар эс ала турган сейил бак аянты пландаштырылып жатканын билдирди.
Жолугушууда мэр шаардык кызматтардын жана бөлүмдөрдүн жетекчилерине тургундардын суроо-талаптарын көзөмөлдөөнү, келип түшкөн суроолорду тез арада карап чыгууну жана кечиктирбестен зарыл болгон жардамды көрсөтүүнү тапшырды.
Мындан сырткары тургундар бала бакчалардын иштөө убактысын кайра карап чыгып, аны кечки саат 19:00гө чейин узартуу мүмкүнчүлүгүн көтөрүштү. Бул сунуш кароого кабыл алынды.
Эске салсак, шаар башчысы бүгүн саат 16:00дө Ленин районунун тургундары менен дагы бир жолугушууну Фрунзе көчөсү, 547 дарегинде Жусуп Баласагын атындагы КУУде өткөрөт.
