Кара-Сууда автоматтык метеостанция ишке киргизилди
19-майда БУУӨП жана Өзгөчө кырдаалдар министрлиги Ош облусунун Кара-Суу районунун Өзгүр айылында жаңы автоматтык метеостанцияны ишке киргизди. Бул тууралуу аталган министрликтин басма сөз кызматы кабарлады.
Маалыматка ылайык, жаңы станция Ош, Баткен өрөөнүндөгү бешинчи объект болуп, суу ташкыны жана сел коркунучтарына каршы эрте эскертүү системасын кеңейтүүгө жардам берет. Бул система бүгүнкү күндө 150 миңден ашуун адамдын коопсуздугун камсыз кылууга багытталган.
Буга чейин мындай метеостанциялар Барпы, Майдан, Жаңы-Ноокат жана Орозбеков айылдарында орнотулган. Ошондой эле Ысык-Көл облусунда дагы эки автоматтык станция ишке киргизилип, климаттык тобокелдиктерди азайтууга жана табигый кырсыктардын кесепеттерин алдын алууга көмөк көрсөтүүдө.
Ак-Буура дарыясы Ош шаары жана ага жакын жайгашкан жамааттар үчүн чоң мааниге ээ. Ошол эле учурда акыркы жылдары аба ырайынын кескин өзгөрүшү, сел жана суу ташкындары бул аймакта туруктуу даярдык канчалык маанилүү экенин көрсөттү. Мындай шартта эрте эскертүү системалары жөн гана техникалык чечим эмес – бул адамдардын өмүрүн, үйлөрдү, жолдорду, социалдык объекттерди жана маанилүү инфраструктураны коргоонун маанилүү бөлүгү.
