Өлкө боюнча 86%1 жазгы талаа иштери аткарылды

Суу ресурстары, айыл чарба жана кайра иштетүү өнөр жайы министрлиги тарабынан 2026-жылдын 18-майына карата жазгы-талаа иштеринин жүрүшүнө мониторинг жүргүзүлдү. Бул тууралуу аталган министрликтин басма сөз кызматы билдирди.

Маалыматка ылайык, бүгүнкү күндө республика боюнча жазгы айдоо иштери 703,9 миң гектар аянтта аткарылып, бул пландын 86,1 пайызын түздү. Жалпы жаздык эгиндер 605,86 миң гектар аянтка себилди. Бул көрсөткүч өткөн жылдын ушул мезгилине салыштырмалуу 145,4 миң гектарга көп.

Тактап айтканда, буудай 96,5 миң гектарга (94,5%), арпа 227,5 миң гектарга (92,0%), жүгөрү 101,7 миң гектарга (91,1%) себилди. Ошондой эле картошка 55,5 миң гектарга (83,5%), жашылча өсүмдүктөрү 41,7 миң гектарга (80,2%) отургузулду.

Мындан сырткары, кант кызылчасы 12,8 миң гектар аянтка (88,2%), пахта 5,7 миң гектарга (89,1%) себилди.

Облустар арасында эң жогорку көрсөткүч Баткен облусунда катталып, жазгы айдоо иштери 96,4 пайызга аткарылды. Ал эми эң төмөнкү көрсөткүч Нарын облусунда болуп, жазгы айдоо 25,9 пайызды түздү.

Жалпысынан республика боюнча жазгы-талаа иштеринин жүрүшү туруктуу нукта уланып, пландалган иштер өз мөөнөтүндө аткарылууда.