Ошто муниципалдык жерлер аукционго коюлат
Ош шаарынын мэриясы шаардагы бир катар муниципалдык жер тилкелерин убактылуу ижарага берүү боюнча аукцион жарыялады. Бул тууралуу аталган мэриянын басма сөз кызматы билдирди.
Маалыматка ылайык, жерлер бир жылдык мөөнөткө соода павильондорун, кичи базарларды, унаа токтотуучу жайларды жана башка коммерциялык объекттерди уюштуруу үчүн берилет.
Аукционго “Керме-Тоо”, “Жибек-Жолу”, “Сулайман-Тоо” жана “Төлөйкөн” аймактарындагы жер тилкелери чыгарылган.
Эң кымбат лот “Керме-Тоо” аймагындагы Көкүм-Бий тилкесинде жайгашкан 8 миң чарчы метрден ашык жер болуп, анын баштапкы баасы 10,9 млн сомду түзөт.
Мындан тышкары, кичи-базар, автоунаа токтотуучу жай жана жеңил соода объекттери үчүн дагы бир нече жер тилкелери сунушталган. Эң арзан лоттун баштапкы баасы 2 миң 730 сом деп белгиленди.
Аукционго катышуу үчүн жарандар тиешелүү документтерди тапшырып, кепилдик төлөм төлөшү керек. Арыздар Ош мэриясынын муниципалдык менчик башкармалыгында кабыл алынат.
