Ыш көйгөйүн чечүү боюнча талкуу өттү
20-майда Жаратылыш ресурстары, экология жана техникалык көзөмөл министрлигинде атмосфералык абанын сапатын жакшыртуу жана ыш көйгөйүн азайтуу боюнча жүргүзүлүп жаткан иштерге арналган ведомстволор аралык комиссиянын кеңейтилген жыйыны өткөрүлдү. Бул тууралуу аталган министрликтин басма сөз кызматы билдирди.
Маалыматка ылайык, жыйындын жүрүшүндө өлкөдөгү экологиялык абал, абанын сапатын туруктуу көзөмөлдөө, булгануунун негизги себептерин азайтуу, зыяндуу заттардын көлөмүн кыскартуу жана мамлекеттик органдардын ишмердүүлүгүн координациялоо маселелери талкууланды.
Белгилүү болгондой, Министрлер Кабинетинин тапшырмасынын негизинде 2025-жылы атмосфералык абанын сапатын жакшыртуу боюнча ведомстволор аралык комиссия түзүлгөн. Комиссиянын курамына 25 министрлик жана ведомство, ошондой эле Жогорку Кеңештин 8 депутаты кирген.
Жыйынга Жогорку Кеңештин депутаттары Жылдыз Эгенбердиева жана Махабат Мавлянова катышып, экологиялык коопсуздукту камсыздоо, жарандардын ден соолугун коргоо жана айлана-чөйрөнү сактоо маселелери бүгүнкү күндүн эң маанилүү багыттарынын бири экенин белгилешти. Депутаттар абанын булганышын азайтуу боюнча натыйжалуу жана ыкчам чараларды көрүү зарылдыгын белгилеп, бир катар практикалык сунуштарын беришти.
