Сүлүктүдө 120 млн сомдук "Белес резорт" туристтик комплекси курулуп жатат
Сүлүктү шаарында “Белес резорт” аталышындагы ири туристтик комплекс курулуп жатат. Бул тууралуу шаардык муниципалитеттен билдиришти.
Маалыматка ылайык, долбоор бюджеттик каражаттын эсебинен каржыланып, курулуш иштерине 120 млн сом бөлүнгөн. Туристтик комплекстин ачылышы 2026-жылдын жай айларына пландалууда.
Аталган объект Сүлүктү шаары жана Лейлек району аймагындагы эң ири эс алуу жайларынын бири болмокчу.
Бүгүн президенттин Баткен облусундагы ыйгарым укуктуу өкүлүнүн орун басары Абдирашит Ташбалтаев курулуш жүрүп жаткан объект менен таанышты. Учурда комплекстеги курулуш иштери кызуу жүрүп жатканы белгиленди.
Иш сапарынын жүрүшүндө Ташбалтаев курулуштун сапатына өзгөчө көңүл буруп, подрядчы компанияга бир катар талаптарды койду. Ошондой эле жергиликтүү бийлик өкүлдөрүнө курулуш иштерин катуу көзөмөлгө алуу тапшырмасы берилди.
