Акыркы коңгуроодогу коомдук тартипти көзөмөлдөөгө 2 миңден ашуун тартип сакчы тартылды
Быйыл борбор калаадагы мектептерди болжол менен 34 миң бүтүрүүчү аяктап жатат. Майрамдык иш-чаралар учурунда коомдук тартипти жана жарандардын коопсуздугун камсыз кылуу үчүн ички иштер органдарынын 2 миңден ашуун кызматкери көзөмөлдөө ишине тартылды.
Бүгүн Бишкек шаарынын ИИББнын Милициянын кайгуул кызмат башкармалыгынын өздүк курамы Ала-Тоо борбордук аянтында саптык кароо жана нускама берүү иш-чарасына чогулушту. Саптык кароо борбор калаанын жалпы билим берүү мекемелеринде өтө турган “Акыркы коңгуроо” майрамына карата уюштурулгандыгын Бишкек шаарынын ИИББнын Басма сөз кызматынан кабарлашты.
Иш-чаранын жүрүшүндө борбордук милициянын жетекчиси өздүк курамга бир катар маанилүү тапшырмаларды берди. Атап айтканда, ар бир кызматкер жарандардын, өзгөчө балдар менен өспүрүмдөрдүн коопсуздугун көзөмөлдөөнү күчөтүү, өзгөчө кырдаалдардын жана укук бузуулардын алдын алуу боюнча профилактикалык иштерди уюштуруу тапшырылды.
Ошондой эле өспүрүмдөрдүн транспорт каражаттарын мыйзамсыз айдоосуна бөгөт коюу, жол кырсыктарын жана автоээнбаштык көрүнүштөрүн алдын алуу маселелерине өзгөчө көңүл бурулду.
Мындан тышкары, өздүк курамга кызмат өтөө учурунда жеке коопсуздугуна өзгөчө көңүл буруу, калкка сапаттуу тейлөө көрсөтүү, ошондой эле суу сактагычтарда, каналдарда, бассейндерде жана башка суу жээктеринде кырсыктардын алдын алуу боюнча профилактикалык иштерди күчөтүү милдеттендирилди.
