Канат Сагынбаев ЕАЭБде кызматкерлердин санариптик профилин өнүктүрүүнү сунуштады
Эмгек, социалдык камсыздоо жана миграция министри Канат Сагынбаев Астанада өткөн V Евразиялык экономикалык форумдун алкагында кызматкерлердин санариптик профилин өнүктүрүү боюнча баяндама жасады.
Министр “Санариптик кызматкер профили: чек арасыз эмгек стажы жана квалификация” аттуу темада сүйлөп, Евразиялык экономикалык биримдиктин жалпы эмгек рыногун өнүктүрүүдө санариптик трансформациянын маанисин белгиледи.
Анын айтымында, санариптик кызматкер профили жарандардын эмгек стажы, квалификациясы жана кесиптик компетенциялары тууралуу маалыматтарды бириктирген бирдиктүү система болуп саналат.
Канат Сагынбаев форумдун катышуучуларына Кыргызстанда социалдык тармакты жана эмгек рыногун санариптештирүү боюнча жүргүзүлүп жаткан иштер тууралуу маалымат берди. Алардын катарында бирдиктүү маалыматтык иш менен камсыз кылуу системасын киргизүү, электрондук эмгек келишимдерин жана электрондук эмгек китепчелерин колдонуу, ошондой эле “Түндүк” ведомстволор аралык системасын өнүктүрүү бар.
Сөзүнүн соңунда министр Кыргызстан ЕАЭБге мүчө мамлекеттер менен эмгек мобилдүүлүгү жана жумуш менен камсыз кылуу жаатындагы санариптик инструменттерди өнүктүрүү боюнча кызматташууга даяр экенин билдирди.
