Сот имаратынан качып кеткен айыпталуучу кармалды
Бүгүн саат 14:50 чамасында, Ош облусунун Ички иштер башкармалыгынын нөөмөт бөлүгүнө, Өзгөн райондук сот имаратынан айыпталуучу качып кеткендиги боюнча маалымат келип түшкөн. Бул тууралуу ИИМдин Басма сөз кызматынан билдиришти.
Билдирүүгө караганда, Өзгөн райондук ички иштер бөлүмүнүн кызматкерлери буга чейин КРнын Кылмыш жаза кодексинин 154-беренеси (Он жети жашка толо элек адамды иш жүзүндө никелик мамилелерге өтүүгө мажбурлоо) менен айыпталган 1992-жылы туулган М.М. аттуу жаранды Өзгөн райондук сотуна алып барышкан.
Болжол менен саат 14:20 чамасында айыпталуучу ажатканага кирип, ал жерден качып кеткендиги маалым болгон.
Дароо, Ош облустук Ички иштер башкармалыгы тарабынан 130 дан ашуун кызматкерлер айгай белгиси менен көтөрүлүп, “Сирена” планы киргизилген. Жүргүзүлгөн ыкчам издөө иш-чараларынын натыйжасында жана «Коопсуз өлкө» камераларынын жардамы менен айыпталуучу изин жашыра электе колго түшкөн. Учурда териштирүү иштери жүргүзүлуп жатат.
