Адылбек Касымалиев Баткендеги социалдык мекемелердин абалын көзөмөлдөдү
Министрлер кабинетинин төрагасы Адылбек Касымалиев эки күндүк иш сапарында Баткен облусуна барып, Лейлек районундагы бир катар маанилүү мекемелердин шарттары менен таанышты.
Алгач өкмөт башчы Лейлек райондук жалпы дарыгердик практика борборунун учурдагы ишмердүүлүгүн көрүп чыкты. Маалыматка ылайык, 2025-жылы борбордун терапия бөлүмүнүн имараты авариялык абалга кептелип, бөлүм жабылган. Учурда терапия бөлүмү негизги имараттын экинчи кабатына көчүрүлүп, убактылуу иштеп жатат.
Медициналык кызматкерлер неврология жана терапия бөлүмдөрү үчүн өзүнчө жаңы имарат куруу зарылдыгын белгилешти. Адылбек Касымалиев бул маселени чечүү боюнча тиешелүү мамлекеттик органдарга сунуштарды иштеп чыгууну тапшырды.
Иш сапардын жүрүшүндө Адылбек Касымалиев Булак-Башы айылындагы "Мега Газоблок КейДжи" ишканасынын ишмердүүлүгү менен да таанышты. Ишкана суткасына 1200 куб метрге чейин сапаттуу газоблок өндүрүү мүмкүнчүлүгүнө ээ.
Белгиленгендей, мындай өндүрүштүн ишке кириши чек арага жакын жайгашкан айылдардын экономикалык өнүгүшүнө жана жаңы жумуш орундарын түзүүгө өбөлгө болот.
Жолугушуунун жыйынтыгында аталган аймактарга көчүп келген жарандар үчүн бардык зарыл шарттарды түзүүнүн маанилүүлүгү белгиленип, социалдык объектилердин курулушун өз убагында жана сапаттуу бүтүрүү жооптуу органдарга тапшырылды.
