Өзгөндө мыйзамсыз курулуш үчүн 100 миң сом айып пул салынды
Өзгөн районунун Лесхоз айылында мыйзамсыз курулуш жана жер тилкесин өз билемдик менен кеңейтүү фактысы аныкталып, жооптуу тарапка 100 миң сом айып пул салынды.Бул тууралуу Айыл чарба министрлигинен билдиришти.
Маалыматка ылайык, текшерүү Өзгөн райондук прокуратурасынын катынын негизинде Жерди жана сууну көзөмөлдөө боюнча кызматтын аймактык башкармалыгы тарабынан жүргүзүлгөн.
Текшерүүнүн жүрүшүндө “Бишкек–Ош” унаа жолунун 631,55-чакырымында оор жүк ташуучу автоунааларды көзөмөлдөө үчүн орнотулган тараза пунктунун жанында укук күбөлөндүрүүчү документтери жок контейнерлер коюлуп, жер тилкеси мыйзамсыз кеңейтилгени аныкталган.
Аталган мыйзам бузуу боюнча акт түзүлүп, 100 миң сом өлчөмүндө айып пул салынды. Натыйжада жер тилкеси баштапкы абалына келтирилди.
