Суу кодексине сунушталган өзгөртүүлөр колдоо тапты
3-июнда Жогорку Кеңештин жыйынында «Суу кодексине өзгөртүүлөрдү киргизүү жөнүндө» мыйзам долбоору биринчи окууда кабыл алынды. Демилгечи — Министрлер кабинетинин төрагасы.
Мыйзам долбоору боюнча баяндама жасаган өзгөчө кырдаалдар министринин орун басары Нурбек Жумалиевдин айтымында, документ калктуу конуштардагы, анын ичинде шаарлардагы дренаждык системалардын иштешин жакшыртууга жана сел, суу ташкыны сыяктуу өзгөчө кырдаалдардын тобокелдиктерин азайтууга багытталган.
Талкуу учурунда депутаттар табигый кырсыктардын кесепеттерин жоюу иштеринин натыйжалуулугун күчөтүү маселелерин көтөрүштү. Эл өкүлү Кубанычбек Самаков ӨКМ кызматкерлеринин штаттык санын көбөйтүү зарылдыгын белгилесе, Умбеталы Кыдыралиев шаарлардагы дренаждык системалардын үзгүлтүксүз иштешинин маанисине токтолду.
Ошондой эле депутат Эльвира Сурабалдиева өрткө каршы кызматтын материалдык-техникалык базасын чыңдап, бийик имараттардагы өрттөрдү өчүрүүгө ылайыкталган атайын техникаларды сатып алуу керектигин айтты. Ал эми Бурул Аманова жаан-чачындан улам жолдорду суу каптоо көйгөйүн көтөрүп, тиешелүү чараларды көрүүгө чакырды.
Мындан тышкары, жыйында «Маркумду узатуу жана сөөгүн жайга коюу иши жөнүндө» мыйзамдын 24-беренесинин колдонулушун 2040-жылдын 1-январына чейин токтотуп туруу тууралуу мыйзам долбоору да биринчи окууда кабыл алынды.
