Таза суу, коопсуздук жана санариптештирүү маселелери көтөрүлдү
3-июндагы Жогорку Кеңештин жыйынында депутаттар ар кыл социалдык-экономикалык көйгөйлөрдү көтөрүшүп, өзгөчө таза суу менен камсыздоо, коопсуздук, айыл чарбасын колдоо жана санариптик өнүгүү маселелерине көңүл бурушту.
Жыйында жаңы Ош базарынын инфраструктурасын өнүктүрүү алкагында канализация жана саркынды сууларды чыгаруу системасын уюштуруу маселеси талкууланды. Ошондой эле Сокулук районундагы калктуу конуштарды борборлоштурулган канализация тармагына кошуу зарылдыгы белгиленип, жер астындагы суулардын коопсуздугуна басым жасалды.
Мындан тышкары, 1999–2000-жылдардагы Баткен окуяларынын катышуучуларына социалдык колдоону күчөтүү, алардын макамын тактоо, медициналык тейлөөнү жакшыртуу жана пенсиялык камсыздоону кеңейтүү сунуштары айтылды. Ошондой эле күч түзүмдөрүнүн кызматкерлерин материалдык жактан камсыздоо маселеси көтөрүлдү.
Жыйында телефондук жана интернет аркылуу жасалган алдамчылык фактыларынын көбөйүшү да талкууга алынып, мамлекеттик органдарды бул кылмыштарга каршы күрөштү күчөтүүгө чакырышты.
Айыл чарба тармагындагы көйгөйлөрдүн катарында сугат суунун жетишсиздиги жана дыйкандарды колдоо маселелери көтөрүлдү. Ошондой эле Ноокат районундагы Кара-Кой жаратылыш паркында санариптик төлөм системаларын киргизүү сунушталды.
Жыйындын жүрүшүндө маалыматтык технологиялардын өнүгүшү жана жасалма интеллекттин таасири тууралуу да сөз болуп, мектептердин окуу программаларына санариптик сабаттуулук жана жасалма интеллект боюнча баштапкы билимдерди киргизүү демилгеси айтылды.
Мындан сырткары, Кыргызстан менен Өзбекстандын чек ара аймактарындагы кызматташтыкты кеңейтүү максатында «Кербен – Мамай» көзөмөл-өткөрүү пунктун ачуу сунушу көтөрүлдү.
Жогорку Кеңештин басма сөз кызматы билдиргендей, көтөрүлгөн маселелер тиешелүү мамлекеттик органдарга жөнөтүлүп, аларды чечүү боюнча чаралар көрүлөт.
