Бишкекте суу объекттеринде коопсуздук чаралары күчөтүлдү
Өзгөчө кырдаалдар министрлиги сууга түшүү сезону алдында Бишкек шаарынын Ленин районундагы бассейндер жана башка суу объекттери текшерилгенин билдирди.
Маалыматка ылайык, атайын комиссия "Максимум", "Деңиз", "Новотел", "Дельфин", "Парус", "Кудайберген" жана "Өнөл" бассейндеринде текшерүү жүргүздү. Ошондой эле Чоң Чүй каналы жана үч суу сактагыч — суткалык жөнгө салуу бассейни, балык өстүрүүчү чарба жана кароосуз калган көлмө көзөмөлдөндү.
Текшерүүгө ӨКМдин райондук бөлүмүнүн, Ленин райондук ички иштер башкармалыгынын, санитардык-эпидемиологиялык көзөмөл борборунун жана муниципалдык аймактык башкармалыктардын өкүлдөрү катышты.
Жыйынтыгында ар бир объект боюнча тиешелүү актылар түзүлүп, кожоюндарга жана кызматкерлерге коопсуздук эрежелерин сактоо боюнча эскертүүлөр берилди. Ошондой эле аныкталган кемчиликтерди жоюу сунушталды.
ӨКМ мындай иш-чаралар шаар тургундарынын коопсуз эс алуусун камсыздоо жана суудагы кырсыктардын алдын алуу максатында өткөрүлүп жатканын белгиледи.
