Экологиялык таза технологиялар үчүн жеңилдетилген насыя берилет
Жаратылыш ресурстары, экология жана техникалык көзөмөл министрлиги атмосфералык абанын булгануусун азайтуу жана экологиялык таза технологияларды жайылтуу максатында “Абанын сапатын жакшыртуу” мамлекеттик программасы ишке ашырылып жатканын билдирди.
Маалыматка ылайык, долбоордун алкагында жеңилдетилген насыялар Элдик Банк, Айыл Банк жана Бакай Банк аркылуу берилет.
Жеке жактар экологиялык таза жылытуу жана энергия системаларын орнотуу үчүн 6 пайыздык үстөк менен 1 миллион сомго чейин насыя ала алышат.
Ал эми ишкерлерге өндүрүштү жаңыртуу жана энергия үнөмдөөчү технологияларды киргизүү үчүн 10 пайыздык үстөк менен 5 миллион сомго чейин каражат берүү каралган.
Насыялар күн панелдерин, жылуулук түтүктөрүн, электр казандарын жана башка экологиялык таза жабдууларды сатып алууга багытталат.
Министрлик жарандарды жана ишкерлерди программага активдүү катышууга чакырып, бул демилге таза экологияны камсыздоого өбөлгө түзөрүн белгиледи.
