Интернетти өзгөчө кырдаалда чектөө боюнча мыйзам долбоору үч окуудан өттү
4-июнда Жогорку Кеңеш Санарип кодексине өзгөртүү киргизүү боюнча мыйзам долбоорун экинчи жана үчүнчү окууда кабыл алды.
Документке ылайык, мамлекет өзгөчө кырдаалдарда, согуштук шартта же улуттук коопсуздукка коркунуч жаралган учурда интернетти жана байланыш кызматтарын убактылуу чектөөгө укук алат.
Мыйзам долбоорун талкуулоо учурунда депутат Кубанычбек Самаков интернет өчүрүлгөн шартта жарандарды эвакуациялоо кандай жүргүзүлөрүнө кызыкты.
Өз кезегинде Улуттук коопсуздук мамлекеттик комитетинин төрагасынын орун басары Алишер Эрбаев мындай учурлар үчүн атайын механизмдер жана жабык байланыш каналдары каралганын билдирди.
Анын айтымында, чек ара жаңжалдары маалында интернет аркылуу күч түзүмдөрүнүн жайгашкан жери жана аракеттери тууралуу маалыматтар тарап, коопсуздукка коркунуч жараткан учурлар болгон.
Ошондой эле ар бир райондо жана айыл өкмөтүндө мобилизациялык даярдык системасы иштей турганы, ал эми облустук жана республикалык деңгээлде ыкчам штабдар түзүлөрү айтылды.
Жыйынтыгында мыйзам долбоору депутаттар тарабынан көпчүлүк добуш менен кабыл алынды.
