“Кытай-Кыргызстан-Өзбекстан” темир жолун куруудагы маселелер талкууланды
4-июнда Суу ресурстары, айыл чарба жана кайра иштетүү өнөр жайы министри Эрлист Акунбеков Манас шаарында өткөн “Кытай-Кыргызстан-Өзбекстан” эл аралык темир жолун куруу маселелерине байланышкан жыйынга катышты.
Көчмө жыйында Жалал-Абад облусу аркылуу өтө турган темир жолдун жеринде жайгашкан турак жай ээлерине кенемте төлөө жана жер тилке маселелери талкууланып, соңунда протоколдук тапшырмалар берилди.
Отурумга тиешелүү мамлекеттик органдардын, жергиликтүү бийликтин жана “Кытай-Кыргызстан-Өзбекстан темир жолу” биргелешкен компаниянын өкүлдөрү катышты.
Андан соң Жалал-Абад туннелинин курулуш иштери жүрүп жаткан объект текшерилди. Иштин жүрүшү менен таанышкан Эрлист Акунбеков бул темир жол Чыгыш менен Батыш өлкөлөрүн байланыштыра турган маанилүү стратегиялык көпүрө экенин белгилди.
Белгилей кетсек, Кыргызстандын аймагындагы “Кытай-Кыргызстан-Өзбекстан“ темир жол долбоорунун жалпы узундугу 304 чакырымдан ашуун аралыкты камтып, курулуштун жалпы наркы 4 млрд 700 млн долларды түзөт.
Темир жолдун курулушу техникалык-инженердик жактан татаал долбоорлордун бири. Анткени жалпы узундугу болжолдуу 120 чакырымды түзгөн 50 көпүрөнүн жана 29 туннелдин курулушу каралган. Бул жалпы темир жолдун 40%зы туннелдерден жана көпүрөлөрдөн тургандыгын билдирет.
Эскерте кетсек, 2024-жылдын 27-декабрында Кытай - Кыргызстан - Өзбекстан темир жолунун курулушунун башталышып, анда Кыргызстандын президенти Садыр Жапаров, Кытайдын төрагасы Си Цзинпин, Өзбекстандын президенти Шавкат Мирзиёев кайрылуу жасашып, бул долбоордун маанилүүлүгүнө токтолушкан.
