Кадамжайдагы эки унаа жолунда сел жүрдү
Баткен облусунун Кадамжай районунда жааган катуу жамгырдан улам Ак-Кыя – Жийделик унаа жолу жана Кызыл-Булак – Тамаша унаа жолунда сел жүрүп, жолдор убактылуу жабылды.
Транспорт жана коммуникациялар министрлиги билдиргендей, суу саат 14:30 чамасында ташкындаган.
Учурда жеринде министрликке караштуу №46 Жол тейлөө ишканасынын кызматкерлери жана атайын техникалар иш алып барууда. Жамгыр токтоп, селдин агымы басаңдагандан кийин жолду тазалоо иштери башталат.
Министрлик кырдаал боюнча кошумча маалымат берилерин билдирди.
