Эсептөө палатасы: 171 кызматкер тартиптик жоопкерчиликке тартылды
2025-жылы жүргүзүлгөн аудиттердин жыйынтыгында мамлекеттик мекемелерде 1 032 мыйзам бузуу жана кемчилик аныкталды. Бул тууралуу Жогорку Кеңештин жыйынында Эсептөө палатасынын төрагасы Алмазбек Акматов билдирди.
Маалыматка ылайык, мыйзам бузууларды жоюу үчүн аудиттен өткөн мекемелерге 503 жазма буйрук, 306 сунуштама жана 7 сунуш жөнөтүлгөн.
Көрүлгөн чаралардын негизинде финансылык мыйзам бузууларга жол берген 171 кызматкер тартиптик жоопкерчиликке тартылып, 14 кызмат адамы кызматынан бошотулган.
Мындан тышкары, Эсептөө палатасынын өзүндө да ички тартип боюнча чаралар көрүлүп, 30 кызматкерге сөгүш жарыяланып, 2 мамлекеттик инспектор кызматынан алынганы маалымдалды.
