Жол эрежесин бузгандарга жаза күчөтүлдү
Президент Садыр Жапаров жол кыймылынын коопсуздугун камсыз кылууга багытталган мыйзамга кол койду. Бул тууралуу президенттин басма сөз кызматы билдирди.
Маалыматка ылайык, “Жол кыймылынын коопсуздугун камсыз кылуу маселелери боюнча айрым мыйзам актыларына өзгөртүүлөрдү киргизүү жөнүндө” мыйзам 2026-жылдын 15-апрелинде Жогорку Кеңеш тарабынан кабыл алынган.
Документтин негизги максаты — жол кырсыктарын азайтуу, айдоочулардын жоопкерчилигин күчөтүү жана жол кыймылынын коопсуздугун камсыз кылуу боюнча чараларды күчөтүү.
Мыйзамга ылайык, мас абалында унаа башкарган, жол кырсыгы болгон жерден качып кеткен жана жол кыймылынын эрежелерин одоно бузган айдоочуларга карата жоопкерчилик күчөтүлөт.
Ошондой эле айрым учурларда транспорт каражатын башкаруу укугунан ажыратуу, ири өлчөмдөгү айып пул салуу жана эркинен ажыратуу чаралары каралган.
Мындан тышкары, мыйзам менен жол эрежелерин автоматтык түрдө каттоочу фото жана видео каражаттарды колдонуу тартиби өзгөртүлүп, айып тууралуу билдирүүлөрдү электрондук форматта жөнөтүү мүмкүнчүлүгү киргизилди.
Жаңы өзгөртүүлөр Кылмыш-жаза кодексине, Укук бузуулар жөнүндө кодекске, Кылмыш-жаза процессуалдык кодексине жана “Кыргыз Республикасындагы жол кыймылы жөнүндө” мыйзамына тиешелүү.
