Ошто мыйзамсыз курулуш аныкталып, дубалдары буздурулду
Ош шаарында мыйзамсыз курулуп жаткан коммерциялык багыттагы объектте курулуш нормаларынын одоно бузулушу аныкталып, сапатсыз тургузулган дубалдар буздурулду. Бул тууралуу Мамлекеттик архитектура-курулуш контролдоо департаменти билдирди.
Маалыматка ылайык, Ош шаарынын Б. Осмонов көчөсүндө жайгашкан коммерциялык объект текшерүүгө алынган. Текшерүүнүн жүрүшүндө курулуш-монтаждоо иштери тиешелүү уруксат берүүчү документтерсиз жүргүзүлүп жатканы аныкталган.
Мындан сырткары, курулуш ченемдеринин жана эрежелеринин талаптары сакталбастан, шайкештик сертификаты жок курулуш материалдары — пескоблоктор колдонулганы белгилүү болгон.
Аталган мыйзам бузууларга байланыштуу курулуш иштерин жүргүзгөн «Кунь-Лунь» ЖЧКсына мыйзам бузууларды жоюу боюнча милдеттүү көрсөтмө берилип, 200 миң сом өлчөмүндө айып пул салынган.
Көзөмөлдүн жыйынтыгында курулуш талаптарын бузуу менен тургузулган дубалдар буздурулуп, объект боюнча мыйзамсыз сатуу иштери токтотулду.
Тиешелүү мекеме курулуш объектилерин көзөмөлдөө иштери мындан ары да улантыларын белгиледи.
