Чүй жана Ысык-Көлдө коопсуздук чаралары күчөтүлөт
Ички иштер министринин орун басары Октябрь Урмамбетов Чүй жана Ысык-Көл облустарында милиция кызматкерлеринин туристтик мезгилге даярдыгын текшерди.
Маалыматка ылайык, жол кыймылынын коопсуздугун камсыздоо кызматкерлеринин материалдык-техникалык базасы, саптык даярдыгы жана жарандар менен иштөө маданияты өзгөчө көңүл борборунда болду.
Ошондой эле жолдо жүргөн айдоочуларга ылдамдыкты ашырбоо, каршы тилкеге чыкпоого байланыштуу түшүндүрүү иштери жүргүзүлүп, эскертүүлөр берилди.
Туристтер үчүн маалыматтык баракчалар да даярдалганы айтылды.
Министрдин орун басары жол кырсыктарын алдын алуу максатында кооптуу тилкелерди кайрадан талдап чыгууну жана кошумча көзөмөл кылууну тапшырды.
Ал ошондой эле кызматкерлерге жарандарга сылык жана маданияттуу мамиле кылуунун маанилүүлүгүн белгилеп, жол коопсуздугун камсыздоодо заманбап технологияларды натыйжалуу колдонуу зарылдыгын баса белгиледи.
