Экономика министрлигинде коррупциялык тобокелдиктер талданды
12-июнда Экономика жана коммерция министрлигинин кызматкерлери үчүн "Мамлекеттик сектордогу коррупциялык тобокелдиктерди башкаруу" темасында семинар уюштурулду. Иш-чараны Башкы прокуратурасынын өкүлү Назгүл Сыдыгалиева өткөрдү.
Министрликтин басма сөз кызматынын маалыматына ылайык, семинар коррупциялык тобокелдиктерди башкаруу боюнча чараларды иштеп чыгуу жана ишке ашыруу боюнча жумушчу топтун биринчи жыйынынын алкагында өттү.
Анын жүрүшүндө катышуучулар коррупциялык тобокелдиктерди аныктоо, баалоо жана башкаруу механизмдери, ошондой эле жемкорлукту алдын алууга багытталган заманбап ыкмалар тууралуу маалымат алышты.
Министрликтин түзүмдүк бөлүмдөрүнө өздөрү аткарып жаткан кызматтарды, административдик жол-жоболорду жана иштерди талдап чыгып, мүмкүн болгон коррупциялык тобокелдиктер боюнча сунуштарды даярдоо милдети жүктөлдү.
