Караколдогу зоопаркта тартип бузулуп, ак куу өлүмгө учурады
Ысык-Көл облусунун Каракол шаарындагы зоопаркта келген адамдардын аракетинен улам бир ак куу өлүп калган. Бул тууралуу “Бугу эне” коомдук фонду билдирди.
Маалыматка ылайык, зоопаркка келген айрым адамдар ак кууларга таш ыргытып, жаныбарларды кордогон учурлар катталган. Фонд мындай аракеттердин кесепетинен бир ак куу өлгөнүн белгиледи.
“Бугу эне” коомдук фонду зоопарк аймагында жаныбарларга таш ыргытууга, тосмодон ашып өтүүгө жана жырткыч жаныбарларга жакындоого катуу тыюу салынганын эскертип, эрежени бузгандарга айып салынарын билдирди.
Белгилей кетсек, фонд жапайы жаныбарларды реабилитациялоо жана жаракат алган же браконьерлерден алынган жаныбарларды дарылоо менен алектенет. Зоопарк элдин жана демөөрчүлөрдүн жардамы менен иштейт.
