Мугалимдердин жайкы өргүүсүнө 14 миллиард сом бөлүндү
Быйыл мугалимдердин жайкы эмгек өргүүсүнө төлөнүүчү каражаттын көлөмү кыйла көбөйдү. Бул тууралуу Агартуу министри Догдуркүл Кендирбаева билдирди.
Маалыматка ылайык, педагогдордун эмгек акысы 2026-жылдын 1-апрелинен тарта орточо 100 %га жогорулатылган. Ушуга байланыштуу мугалимдердин эмгек өргүү төлөмдөрүн өз убагында каржылоо үчүн 14 миллиард сом бөлүндү.
Эмгек өргүүсүнүн акысы акыркы үч айдагы орточо айлык маянанын негизинде эсептелгендиктен, эмгек акынын өсүшү төлөмдөрдүн көлөмүнө түздөн-түз таасир эткен. Натыйжада жаңыдан ишке орношкон мугалимдердин өргүү төлөмү 57 миң сомдон башталса, тажрыйбалуу окутуучулардыкы 200 миң сомго чейин жетүүдө.
Мындан тышкары, бийик тоолуу жана жетүүгө кыйын аймактарда иштеген мугалимдерге негизги 56 күндүк эмгек өргүүсүнө кошумча 12 күн берилет.
Министрликтин маалыматына караганда, эмгек өргүү төлөмдөрүнүн өз убагында берилиши мугалимдерге жайкы эс алуусун пландаштырууга жана үй-бүлөлүк чыгымдарын жабууга жакшы мүмкүнчүлүк түзүүдө.
