Нарында туристтик милиция кызматы ишке кирет
Нарын облусунда туристтердин коопсуздугун камсыздоого багытталган туристтик милиция кызматы иштей баштайт. Бул тууралуу облустук милициядан билдиришти.
Маалыматка ылайык, жаңы кызматтын курамына 20 кызматкер кирип, алар туристтер көп каттаган аймактарда коомдук тартипти жана коопсуздукту көзөмөлдөшөт.
Туристтик милициянын негизги милдеттерине туристтерге маалыматтык жана кеңеш берүү кызматтарын көрсөтүү, укук бузуулардын алдын алуу, коомдук коопсуздукту камсыз кылуу жана өзгөчө кырдаалдарда ыкчам жардам көрсөтүү кирет.
Кызматкерлер туристтик маршруттарда, эс алуу жайларында жана туристтер көп чогулган аймактарда нөөмөт өтөп, жергиликтүү жана чет өлкөлүк коноктор үчүн коопсуз шарттарды түзүүгө көмөктөшөт.
Белгиленгендей, туризмди өнүктүрүүдө коопсуздук негизги факторлордун бири болуп саналат. Туристтик милиция кызматынын ишке кириши туристтик сезондун коопсуз жана уюшкандыкта өтүшүнө өбөлгө түзөт.
Эске салсак, Ички иштер министрлигинин демилгеси менен туристтердин коопсуздугун камсыздоо максатында өлкөнүн бардык аймактарында туристтик милиция кызматтары түзүлүүдө.
