Бишкекте батир ижарасы боюнча алдамчылыкка шектүү адам кармалды
Бишкек шаарында интернет аркылуу батирди ижарага берем деп жаранды алдап кеткен деп шектелген жаран кармалды. Бул тууралуу Октябрь райондук ички иштер башкармалыгы маалымдады.
Маалыматка ылайык, ушул жылдын 15-май күнү шаар тургуну интернеттеги Lalafo жарыялар платформасынан батир ижарасы тууралуу сунуш таап, алдын ала төлөм катары 50 миң сом которгон. Бирок акча алынгандан кийин жарыя берген адам байланыштан чыгып кеткен.
Аталган факт боюнча алдамчылык беренеси менен кылмыш иши козголуп, тергөө иштери башталган.
Ыкчам-иликтөө иштеринин жүрүшүндө милиция кызматкерлери шектүүнүн өздүгүн аныктап, аны кармашкан. Кармалган жаран 44 жаштагы К.К. экени белгилүү болду. Учурда ал убактылуу кармоочу жайга киргизилди.
Милиция кызматкерлери анын ушул сыяктуу башка фактыларга да тиешеси бар-жогун текшерип жатышат. Укук коргоо органдары аталган жарандан жабыркагандарды же ал тууралуу маалыматка ээ болгон адамдарды милицияга кайрылууга чакырды.
