Бишкектеги “Алтын Така” мал базарында пландан тышкары текшерүү жүргүзүлдү
Бүгүн суу ресурстары, айыл чарба жана кайра иштетүү өнөр жайы министринин биринчи орун басары Илич Марсбек уулу министрдин тапшырмасынын негизинде Бишкек шаарындагы ”Алтын Така” мал базарында пландан тышкаркы мониторинг жүргүздү.
Ведомствонун маалыматына ылайык, мониторингдин жүрүшүндө ветеринардык лабораториянын жана ветеринардык дарыкананын ишмердүүлүгү, малдарды ветеринардык коштоочу документтер менен камсыздоо, ошондой эле базардын санитардык абалы текшерилди.
Текшерүүнүн жыйынтыгында тиешелүү кызматтарга ветеринардык-санитардык талаптардын сакталышын күчөтүү, аймактагы тартипти жана тазалыкты жакшыртуу боюнча тапшырмалар берилди.
Белгилей кетсек, учурда өлкөнүн бардык аймактарындагы мал базарларында жана азык-түлүк базарларында мониторингдик иштер жүргүзүлүүдө. Бул багыттагы көзөмөл иш-чаралары мындан ары да улантылат.
