Борбордук Азия жана ШКУнун кызматташтыгы боюнча эл аралык конференция өттү

Тышкы иштер министринин орун басары Медер Абакиров 12-июнда Тажикстандын борбору Дүйшөмбү шаарында өткөн "Борбордук Азия – ШКУнун өзөгү: тынчтык жана биргелешкен өнүгүү мейкиндиги" аттуу конференцияга катышты.

Министрликтин басма сөз кызматы билдиргендей, иш-чарада Шанхай кызматташтык уюмунун алкагында Борбордук Азиянын ролун чыңдоо, аймактагы тынчтыкты жана туруктуулукту камсыз кылуу, ошондой эле ШКУга мүчө мамлекеттердин ортосундагы кызматташтыкты кеңейтүү маселелери талкууланды.

Өз сөзүндө Медер Абакиров Борбордук Азия ШКУнун өнүгүүсүндө өзгөчө орунду ээлеп, ишенимдин, ынак коңшулуктун жана өз ара пайдалуу кызматташтыктын маанилүү мейкиндиги болуп каларын белгиледи.

Ошондой эле Кыргызстандын ШКУга төрагалыгына өзгөчө көңүл бурулуп, ал «ШКУга 25 жыл: туруктуу тынчтыкка, өнүгүүгө жана гүлдөп-өсүүгө карай бирге» деген ураан алдында өтүп жатканы айтылды.

Кыргыз тарап уюмду мындан ары чыңдоо жана анын күн тартибин конкреттүү мазмун менен толтуруу боюнча иш алып барарын билдирди.