Сулайман-Тоодогу көрүстөндөрдүн темир тосмолору алынууда
Ош шаарындагы Сулайман-Тоо музей-комплексинин коргоо аймагында жайгашкан көрүстөндөрдөгү темир тосмолорду демонтаждоо иштери башталды. Бул чечим Маданият, маалымат жана жаштар саясаты министрлигинин алдындагы ведомстволор аралык комиссия тарабынан кабыл алынган.
Музей-комплекстин маалыматына ылайык, иштер өрт коопсуздугун камсыз кылуу, Сулайман-Тоонун өзгөчө экосистемасын сактоо, ошондой эле көрүстөндөрдүн аймагын тазалоо жана көрктөндүрүү максатында жүргүзүлүүдө.
Буга чейин коргоо аймагындагы көрүстөндөрдү тартипке келтирүү үчүн атайын ведомстволор аралык комиссия түзүлгөн. Анын курамына министрликтердин өкүлдөрү, Ош шаардык мэриясы, Өзгөчө кырдаалдар министрлиги, Кыргызстандын мусулмандарынын дин башкармалыгы, окумуштуулар жана музейдин адистери кирген.
Комиссия жүргүзгөн талдоонун жыйынтыгында белгиленген талаптарга жооп бербеген курулмаларды этап-этабы менен алып салуу зарыл деген бүтүм чыгарылган.
Иштер аяктагандан кийин жооптуу органдар дүйнөлүк мааниге ээ болгон объекттин аймагын сактоо жана көрктөндүрүү боюнча кошумча чараларды улантарын билдиришти.
