Электр менен жылытууга жаңы объекттерди кошууга коюлган чектөө узарды
Министрлер кабинети Токтогул суу сактагычында суу жетиштүү көлөмдө топтолгонго чейин электр энергиясын көп керектеген жаңы объекттерди тармакка кошууга киргизилген чектөөнү күчүндө калтырды. Бул тууралуу өкмөттүн 2026–2027-жылдардын күз-кыш мезгилине даярдык көрүү боюнча кабыл алган токтомунда көрсөтүлөт.
Токтомдо калкты электр энергиясы, жаратылыш газы жана көмүр менен үзгүлтүксүз камсыздоо боюнча даярдык чаралары каралган.
Өкмөттүн маалыматына ылайык, Токтогул суу сактагычындагы суунун көлөмү жетишсиз болуп жаткандыктан, электр энергиясын көп талап кылган өндүрүш ишканаларын жана үч фазалуу электр жылытуу системасын пайдаланган турак үйлөрдү электр тармагына жаңыдан кошууга тыюу салынган тартип сакталат.
Мындай чаралар Кыргызстандын дарыяларындагы суунун агымынын азайышы жана аймактагы жалпы климаттык кырдаал менен түшүндүрүлгөн. Буга чейин да суу сактагычтагы суунун деңгээли төмөн болгонуна байланыштуу ушундай эле чектөөлөр киргизилген.
Адистердин пикиринде, Токтогулдагы суунун көлөмү — өлкөнүн энергетикалык коопсуздугу үчүн негизги көрсөткүчтөрдүн бири.
