Түптө өсүмдүк майын өндүрүүнү кеңейтүүгө колдоо көрсөтүлөт

Ысык-Көл облусуна болгон иш сапарынын алкагында Суу ресурстары, айыл чарба жана кайра иштетүү өнөр жайы министринин орун басары Рустам Балтабаев аймактагы кайра иштетүүчү ишканалардын жана айыл чарба кооперативдеринин ишмердүүлүгү менен таанышты.

Министрликтин маалыматына ылайык, Түп районундагы "Эрдик" кооперативине өзгөчө көңүл бурулуп, анда жаңы сафлор жана зыгыр майын өндүрүүчү цехтин иши каралды. Ошондой эле кошумча өндүрүмдөрдү мал тоютуна кайра иштетүү иштери көрсөтүлдү.

Кооператив учурда чийки зат базасын кеңейтүүдө. Былтыр 100 гектардан ашык аянтка сафлор жана зыгыр эгилсе, быйыл кластердик ыкма ишке киргизилип, фермерлер үрөн менен камсыздалып, түшүмдү кепилденген сатып алуу механизми жолго коюлган. Натыйжада айдоо аянтын 450–500 гектарга чейин жеткирүү пландалууда.

Ишкананын жетекчилиги өндүрүштү мындан ары кеңейтүү үчүн кошумча каржылык колдоо керек экенин билдирип, бул келечекте Түп районун жана жалпы Ысык-Көл облусун өсүмдүк майы менен камсыздоого шарт түзөрүн белгиледи.

Рустам Балтабаев 2040-жылга чейин айыл чарба өндүрүмдөрүн кайра иштетүүнүн деңгээлин 50%га жеткирүү максаты туруктуу чийки зат базасын түзүү жана мамлекет менен өндүрүүчүлөрдүн тыгыз кызматташуусу аркылуу гана ишке аша турганын айтты.

Жыйынтыгында министрдин орун басары тиешелүү түзүмдөргө кооперативге колдоо көрсөтүү жана фермерлер арасында сафлор, зыгыр сыяктуу кирешелүү өсүмдүктөрдүн айдоо аянтын кеңейтүү боюнча иштерди күчөтүү тапшырмасын берди.

Министрлик билдиргендей, өсүмдүк майы социалдык мааниге ээ азыктардын катарына кирет. Ошондуктан импортту алмаштырууга, жаңы жумуш орундарын түзүүгө жана өлкөнүн азык-түлүк коопсуздугун чыңдоого багытталган долбоорлор мындан ары да колдоого алынары айтылды.