Ысык-Көлдө эл аралык мелдеш өтө турган аймактагы курулуш иштери күчөтүлдү
Курулуш, архитектура жана турак жай-коммуналдык чарба министри Нурдан Орунтаев Ысык-Көл облусуна болгон жумушчу сапарында бир катар курулуш объектилериндеги иштердин жүрүшү менен таанышты. Бул тууралуу министрликтин басма сөз кызматы билдирди.
Маалыматка ылайык, Нурдан Орунтаев алгач быйыл Ысык-Көлдө өтө турган F1H2O суудагы Формула-1 боюнча дүйнө чемпионатын өткөрүүгө даярдык көрүлүп жаткан аймакка барды.
Учурда аталган жерде инфраструктураны жакшыртуу боюнча бир катар иштер жүргүзүлүүдө. Алардын катарында унаа токтотуучу жайларды куруу, жолдорго асфальт төшөө жана узундугу 800 метрди түзгөн жөө адамдар өтүүчү жолдорду салуу иштери бар.
Объектте көчмө жумушчу жыйын өткөрүлүп, ага Туризмди өнүктүрүү боюнча мамлекеттик агенттиктин директору Эдуард Кубатов, ошондой эле жергиликтүү мамлекеттик органдардын өкүлдөрү катышты.
Жыйындын жүрүшүндө курулуш иштерин каржылоо, аймакты көрктөндүрүү, коопсуздук талаптарын камсыз кылуу жана эл аралык мелдешти өткөрүүгө байланышкан уюштуруу маселелери талкууланды.
Министр Нурдан Орунтаев даярдык иштеринин сапатына өзгөчө көңүл буруп, бардык иштерди белгиленген мөөнөттө жана талаптагыдай деңгээлде бүткөрүү боюнча тиешелүү тапшырмаларды берди.
Белгилей кетсек, F1H2O World Championship — суу-мотор спорту боюнча дүйнөдөгү эң абройлуу чемпионаттардын бири болуп саналат. Эл аралык мелдеш дүйнөнүн алдыңкы спортчуларын жана командаларын бириктирип, миллиондогон көрүүчүлөрдүн көңүлүн бурат. Чемпионаттын Ысык-Көлдө өткөрүлүшү Кыргызстандын туристтик мүмкүнчүлүктөрүн эл аралык деңгээлде таанытууга өбөлгө түзөт.
