Баткенде 5 млн сомдон ашык алдамчылыкка шектүү жаран кармалды
Баткен облусунда автоунааларды сатып алуу-сатуудагы алдамчылыкка шектелген жаран кармалды. Бул тууралуу облустук ички иштер башкармалыгы билдирди.
Маалыматка ылайык, 27 жаштагы жаран милицияга кайрылып, таанышы беш автоунааны сатууга жардам берүү шылтоосу менен алып кеткенин билдирген.
Мындан тышкары, шектүү бизнес ачуу үчүн деп жабырлануучудан 3 млн 510 миң сом алып, аны кыска мөөнөттө кайтарып берүүнү убадалаган. Бирок кийин байланышка чыкпай, из жашырып кеткен.
Тергөө маалында жабырлануучуга жалпысынан 5 млн 295 миң сомдук материалдык зыян келтирилгени аныкталган.
Аталган факт боюнча кылмыш иши козголуп, шектүү катары Кочкор-Ата шаарынын 45 жаштагы тургуну кармалды. Ал убактылуу кармоочу жайга киргизилип, тергөө иштери уланууда.
