Эмгек акыны баалардын өсүшүнө жараша көбөйтүү каралууда
Жогорку Кеңештин Эмгек, саламаттык сактоо, аялдар иштери жана социалдык маселелер боюнча комитети 15-июнда эмгек акыны индексациялоого байланыштуу мыйзам долбоорун экинчи окууда жактырды.
Парламенттин басма сөз кызматы белгилегендей, мыйзам долбоору кызматкерлердин эмгек акысынын чыныгы наркын сактоо жана инфляциянын таасирин азайтуу максатында иштелип чыккан. Демилгечилер – эл өкүлдөрү Гульнара Акимбаева, Равшанбек Рысбаев, Гүлнара Баатырова, Таалайбек Масабиров.
Документте менчиктин түрүнө карабастан бардык уюмдарда эмгек акыны баалардын өсүшүнө жараша жогорулатуу үчүн бирдиктүү укуктук механизм киргизүү сунушталууда.
Талкуу учурунда депутаттар жарандардын кирешелерин коргоо, индексация талаптарын аткарбаган иш берүүчүлөрдүн жоопкерчилиги жана кызматкерлердин социалдык кепилдиктерине байланышкан маселелерди көтөрүштү.
Жыйынтыгында мыйзам долбоору депутаттардын сунуштарын эске алуу менен экинчи окууда колдоого ээ болду.
