Эмгек чөйрөсүндөгү басым жана куугунтук маселеси талкууланды
Жогорку Кеңештин төрагасынын алдындагы Аялдардын, балдардын укуктарын коргоо жана гендердик теңчилик боюнча кеңештин 15-июндагы кезектеги отурумунда эмгек чөйрөсүндөгү зомбулук жана куугунтук маселеси каралды.
Парламенттин басма сөз кызматы билдиргендей, жыйында эмгек чөйрөсүндөгү зомбулук боюнча улуттук изилдөөнүн концепциясы сунушталды. Отурумга депутаттар, мамлекеттик органдардын, эл аралык уюмдардын жана жарандык коомдун өкүлдөрү катышты.
Төрага Марлен Маматалиев жумуш ордундагы психологиялык басым, басмырлоо, коркутуу жана куугунтук көрүнүштөрү орчундуу көйгөй экенин белгилеп, аларды алдын алуу үчүн толук статистикалык база түзүү жана комплекстүү мамлекеттик чараларды иштеп чыгуу зарылдыгын айтты.
Депутат Камила Талиева Эл аралык эмгек уюмунун №190 конвенциясын ишке ашыруу боюнча сунуштарын айтты.
«Эл аралык эмгек уюмунун №190 конвенциясы Кыргызстандын жарандары үчүн коопсуз, татыктуу жана зомбулуксуз эмгек шарттарын камсыз кылууга багытталган маанилүү документ. Анын жоболорун ишке ашыруу үчүн убактылуу нускама практикалык механизм болуп, жумушчулардын укуктарын коргоону камсыз кылышы керек. Ишенимдүү маалыматтарсыз натыйжалуу мамлекеттик саясатты иштеп чыгуу мүмкүн эмес», — деди эл өкүлү Камила Талиева.
Жыйында катышуучулар да сунуш-пикирлерин билдирип, бул багыттагы иштерди улантуу боюнча макулдашышты.
