Министр Караколдогу тарых музейин жаңылоо иштерин текшерди
Каракол шаарындагы тарыхый музейде толук реконструкция иштери жүрүп жатат. Бул тууралуу Курулуш, архитектура жана турак жай-коммуналдык чарба министринин басма сөз кызматы билдирди.
Маалыматка ылайык, долбоор жергиликтүү бюджеттин эсебинен каржыланып, жалпы наркы 159 млн сомду түзөт. "Кыргызкурулуш" мамлекеттик ишканасы учурда объектте оңдоп-түзөө жана калыбына келтирүү иштерин улантууда.
Министр Нурдан Орунтаев курулуштун сапатына көңүл буруп, тарыхый-архитектуралык мурастын сакталышын камсыз кылуу, бардык иштерди өз убагында бүтүрүү боюнча тапшырмаларды берди. Ошондой эле музейди заманбап маданий жана туристтик борбор катары өнүктүрүү зарылдыгын белгиледи.
Башкы планга ылайык, музей комплекси жалпы аянты 1316 чарчы метрди түзгөн үч корпустан турат. Долбоордун алкагында имараттын ички жасалгаларын, архитектуралык көрүнүшүн жакшыртуу жана инженердик тармактарды толук жаңылоо каралган.
Долбоор аймактык инфраструктураны жакшыртууга, тарыхый-маданий мурастарды сактоого жана туризм тармагын өнүктүрүүгө багытталган.
