Россиядагы кыргызстандык үй-бүлөгө 2,2 млн рубль камсыздандыруу төлөмү берилди
Кыргыз Республикасынын Эмгек, социалдык камсыздоо жана миграция министрлигинин Россия Федерациясындагы Өкүлчүлүгү каза болгон кыргызстандыктын үй-бүлөсүнө камсыздандыруу төлөмдөрүн алууга көмөк көрсөттү.
Министрликтин маалыматына ылайык, Кыргыз Республикасынын жараны Х.А.нын багуучусунан ажырагандыгына байланыштуу камсыздандыруу төлөмдөрүн алуу боюнча кайрылуусу түшкөн. Бул боюнча өкүлчүлүк тиешелүү сүйлөшүүлөрдү жүргүзүп, Россиянын Социалдык фондунун Москва шаары жана Москва облусу боюнча бөлүмүнө расмий кайрылууларды жөнөткөн.
Жүргүзүлгөн иштердин натыйжасында 2026-жылдын 10-июнунда жарандын үй-бүлөсүнө 2 млн 200 миң рубль өлчөмүндө бир жолку камсыздандыруу төлөмү берилди.
Мындан тышкары, каза болгон жарандын үч жашы жете элек баласына бойго жеткенге чейин ай сайын төлөнүүчү камсыздандыруу төлөмү дайындалды.
Министрликтен белгилешкендей, чет өлкөдө эмгектенип жүргөн кыргызстандыктардын жана алардын үй-бүлө мүчөлөрүнүн социалдык укуктарын коргоо өкүлчүлүктүн негизги багыттарынын бири болуп саналат.
