Тоголок алтын кени өлкөнүн өз каражаты менен иштетиле баштады
Кыргызстандын тарыхында биринчи жолу ири Тоголок алтын кени өлкөнүн өз күчү жана каржылоосу менен өздөштүрүлө баштады. Долбоорду "Кумтөр Оперейтинг Компани" ишке ашырууда.
Ишкананын маалыматына караганда, кен деңиз деңгээлинен 4 000 метр бийиктикте жайгашкан Ак-Шыйрак тоо кыркалары аймагында болгондуктан иштетилбей келген.
Учурда кыртышты ачуу иштери жүрүүдө. Алдыдагы 1–1,5 айдын ичинде алгачкы алтын коруна жетүү пландалууда.
“Учурда кууш жолдор кеңейтилди, көпүрө курулду. Кенчилер үчүн 85 орундуу модулдук жатакана салынды, ошондой эле ири техникалар алынып келинди”, — деп айтылат маалыматта.
Алтын ылгоочу фабрика, жумушчулар шаарчасы жана калдыктарды сактоочу жай куруу үчүн кытайлык "Нерин Инжениринг" компаниясы тандалган. Келишимге 2026-жылдын апрелинде кол коюлган.
