"Түндүк" тиркемесине "Шайлоочунун кабинети" кызматы кошулду

"Түндүк" мобилдик тиркемесинде "Шайлоочунун кабинети" аттуу жаңы санариптик кызмат ишке киргизилди. Бул тууралуу Борбордук шайлоо комиссиясы билдирди.

Жаңы кызмат жарандарга шайлоо тилкеси тууралуу маалыматты онлайн режимде алууга, буга чейин берилген арыздарды көрүүгө жана каттоосу кайда которулганын текшерүүгө мүмкүнчүлүк берет.

Буга чейин "Шайлоочунун кабинети" өзүнчө веб-сайт түрүндө иштеп келсе, эми анын негизги функциялары "Түндүк" тиркемесине интеграцияланды. Мунун аркасында шайлоочулар керектүү маалыматтарды бирдиктүү мамлекеттик санариптик канал аркылуу тез жана ыңгайлуу ала алышат.

БШКнын маалыматына ылайык, кызматты ишке киргизүү мамлекеттик кызматтардын ачыктыгын жана жеткиликтүүлүгүн жогорулатуу максатын көздөйт.

Жаңы кызмат "Түндүк" тиркемесине катталып, тастыктоодон өткөн колдонуучулар үчүн жеткиликтүү.