Акыйкатчы Анкарада кармалган кыргыз жараны боюнча расмий кат жолдоду
Акыйкатчы Жамиля Жаманбаева Түркиянын башкы омбудсмени Мехмет Акаржага Анкара шаарында кармалган кыргыз жаранынын укуктарын коргоого көмөк көрсөтүү өтүнүчү менен расмий кат жолдоду.
Акыйкатчы институтунун маалыматына ылайык, 34 жаштагы кыргыз жараны 26-майда Анкарадагы “Эсенбога” эл аралык аэропортунда кармалган. Ал Бишкек – Анкара – Түндүк Кипр каттамы менен жубайы жана үч баласы менен бара жаткан.
Жакындары акыйкатчыга кайрылып, кармоонун себептери тууралуу так маалымат берилбей жатканын жана адвокат менен жолугушуу уюштуруу аракеттери натыйжа бербей жатканын билдиришкен.
Акыйкатчы эки өлкөнүн омбудсмендер ортосундагы кызматташтык тууралуу меморандумга таянып, түрк тараптан жаранга карата мыйзамдуу жана укуктук жардам көрсөтүүнү өтүндү.
Ошондой эле ал Кыргызстандын Тышкы иштер министрлигине да кайрылып, консулдук-укуктук жардам көрсөтүүнү тездетүү зарылдыгын белгиледи.
