Ишкерлердин жана инвесторлордун укуктарын коргоо маселеси талкууланды
16-июнда Жогорку Кеңештин төрагасынын биринчи орун басары Медербек Алиев, депутаттар Гүлнара Баатырова жана Эльвира Сурабалдиева Башкы прокуратуранын алдында түзүлгөн Ишкерлердин жана инвесторлордун укуктарын коргоо боюнча консультативдик кеңештин кезектеги жыйынына катышты.
Парламенттин басма сөз кызматы маалымдагандай, прокуратура органдары тарабынан ишкерлердин жана инвесторлордун укуктарын коргоо багытында жүргүзүлүп жаткан иштер тууралуу маалыматтар берилди. Ошондой эле консультативдик кеңештин мурдагы жыйынынын жыйынтыгы менен бекитилген иш-чаралар планынын аткарылышы талкууланды.
Мындан сырткары, Экономика жана коммерция министрлигинин, ошондой эле Инвестициялар боюнча улуттук агенттиктин өкүлдөрү өлкөдө ишкердикти өнүктүрүү, инвестициялык саясатты жүзөгө ашыруу жана инвесторлор үчүн жагымдуу шарттарды түзүү боюнча көрүлүп жаткан чаралар тууралуу баяндама жасашты.
Жыйында бизнес-ассоциациялардын өкүлдөрү да сөз сүйлөп, ишкерлерди түйшөлткөн орчундуу маселелерди көтөрүп, аларды чечүү боюнча сунуштарын билдиришти. Ошондой эле мамлекеттик органдар менен жеке сектордун кызматташтыгын күчөтүү маселелери талкууланды.
Жыйындын жыйынтыгында ишкерлердин жана инвесторлордун мыйзамдуу укуктарын коргоону күчөтүү, инвестициялык климатты жакшыртуу жана бизнес жүргүзүүгө ыңгайлуу шарттарды түзүү боюнча бир катар сунуштар белгиленди.
с
