Кыргыз-тажик чек арасында мал аткезчилигине бөгөт коюлду
16-июнга караган түнү Баткен районундагы Курук-Сай айылында Кыргызстандан Тажикстанга 17 баш бодо малды мыйзамсыз айдап өтүү аракети токтотулду. Бул тууралуу Мамлекеттик чек ара кызматы билдирди.
Маалыматка ылайык, саат 00:30 чамасында Баткен чек ара отрядынын кызматкерлери мамлекеттик чек аранын зым тосмосу алдын ала кесилип, эки адам 17 баш бодо малды Тажикстан тарапка айдап өтүүгө аракет кылып жатканын аныкташкан.
Чек арачылардын токтотуу тууралуу мыйзамдуу талаптарына баш ийбеген жарандар аракетин улантышкан. Натыйжада наряддын улук жоокери эскертүү иретинде асманга ок чыгарган. Бирок шектүүлөр кармоо учурунда каршылык көрсөткөндүктөн, чек арачылар кырдаалга ылайык курал колдонууга аргасыз болушкан.
Окуянын кесепетинен чек араны мыйзамсыз бузууга аракет кылгандардын бири бутунан жаракат алган. Ага чек арачылар тарабынан алгачкы медициналык жардам көрсөтүлүп, Баткен шаарындагы ооруканага жеткирилген. Дарыгерлер анын абалы канааттандырарлык экенин билдиришти.
Кармалган жарандар андан аркы териштирүү иштерин жүргүзүү үчүн укук коргоо органдарына өткөрүлүп берилди. Учурда окуя боюнча тиешелүү иликтөө иштери жүрүп жатат.
Белгилей кетсек, Кыргызстанда азык-түлүк коопсуздугун камсыздоо максатында бодо малды жана майда жандыктарды өлкө аймагынан сыртка чыгарууга убактылуу тыюу салынган. Мындай чечим өлкөдө эттин баасынын өсүшүнө байланыштуу кабыл алынган.
