Жер казынасын пайдалануу боюнча 836 мыйзам бузуу аныкталды
Жаратылыш ресурстары, экология жана техникалык көзөмөл министрлиги мурда берилген бардык жер казынасын пайдалануу укугуна лицензияларды жана лицензиялык келишимдердин аткарылышын текшерди.
Министрликтин маалыматына ылайык, бүгүнкү күндө жер казынасын пайдаланууга берилген лицензиялардын саны 2 миңге жакын. Текшерүүнүн жыйынтыгында лицензиялардын жана лицензиялык келишимдердин шарттары бузулган 836 учур аныкталды.
Мыйзам бузууларды жоюу жана тармакта тартип орнотуу максатында көрүлгөн чаралардын алкагында 600гө жакын лицензиянын аракети убактылуу токтотулуп, айрым лицензиялар толугу менен жокко чыгарылды.
Эң көп кездешкен мыйзам бузууларды калыбына келтирүү эсептери жана алардын реквизиттери тууралуу маалыматтардын берилбегени, бонустарды төлөө боюнча милдеттенмелердин аткарылбаганы, лицензиялардын мөөнөтүнүн өтүп кетиши, ошондой эле башка милдеттүү лицензиялык талаптардын сакталбаганы кирет.
Кыргыз геология кызматына жер казынасын пайдалануу жаатындагы мыйзамдардын сакталышын камсыз кылуу жана аныкталган ар бир мыйзам бузуу фактысы боюнча тиешелүү чараларды көрүү иштерин улантуу тапшырмасы берилди.
