ЖК комитети Пакистан менен соттолгондорду алмашуу келишимин колдоду
16-июнда Жогорку Кеңештин Сот-укук маселелери, укук тартиби жана кылмыштуулук менен күрөшүү боюнча комитети Кыргызстан менен Пакистандын ортосунда соттолгон жарандарды өткөрүп берүү тууралуу келишимдин долбоорун карап чыгып, жактырды.
Башкы прокурордун орун басары Үмүткан Коңкубаева Кыргызстанда 8 миң 681 Пакистандын жараны каттоодо турганын маалымдады. Анын айтымында, 2025-жылы өлкөгө 14 миң 591 пакистандык кирсе, 15 миң 280 адам өлкөдөн чыгып кеткен.
Коңкубаеванын билдиришинче, 2024-жылы Укук бузуулар жөнүндө кодекстин 431-беренеси боюнча 2012 чет өлкөлүк жаран жоопкерчиликке тартылып, алардын 672си өлкөдөн чыгарылган.
Учурда Кыргызстандагы түзөтүү мекемелеринде 18 Пакистан жараны жаза өтөп жатат. Алардын бири өмүр бою эркинен ажыратылган.
“Бар болгон маалыматка ылайык, Пакистандын аймагында эркинен ажыратуу жайларында жаза өтөп жаткан Кыргыз Республикасынын жарандары жок. Бул кыргызстандыктардын Пакистандагы абалы криминогендик жагынан салыштырмалуу коопсуз экенин көрсөтөт. КРнын Пакистандагы элчилигинин маалыматына ылайык, 2025-жылдын экинчи жарым жылдыгына карата консулдук каттоодо 191 кыргыз жараны турат, алардын 120сы туруктуу каттоодо”, - деди Үмүткан Коңкубаева.
Расмий маалымат боюнча, 2024-жылы чет мамлекеттерден 221 кыргызстандык экстрадицияланып, мекенине кайтарылган. Чет өлкөлөрдө жаза өтөп жаткан жарандарды өткөрүп берүү жана алмашуу иштери мамлекеттер аралык келишимдердин негизинде жүргүзүлөт. Бул багыттагы ыйгарым укуктуу орган болуп Башкы прокуратура саналат.
