Агротехнопаркка 27,2 млн сомдук жабдуулар тапшырылды
17-июнда Суу ресурстары, айыл чарба жана кайра иштетүү өнөр жайы министрлигинде маалыматтарды сактоочу жана иштетүүчү жабдууларды тапшыруу аземи өттү. Бул тууралуу министрликтин басма сөз кызматы билдирди.
Маалыматка ылайык, иш-чарага министрдин орун басары Рустам Балтабаев катышты. Жабдуулар Дүйнөлүк банктын каржылоосу менен ишке ашырылып жаткан «Туруктуу агроазык-түлүк кластерлерин өнүктүрүү» долбоорунун алкагында Агротехнопаркка берилди.
Министрликтин маалыматына ылайык, жабдуулардын жалпы наркы 27 млн 223 миң 300 сомду түзөт. Алар маалыматтарды иштеп чыгуу борборун түзүүгө жана Агротехнопарктын санариптик мүмкүнчүлүктөрүн кеңейтүүгө пайдаланылат.
Министрлик бул демилге мамлекеттик кызмат көрсөтүүлөрдүн сапатын жакшыртууга, фермерлерди колдоого жана өлкөнүн азык-түлүк коопсуздугун бекемдөөгө көмөк көрсөтөрүн белгиледи.
