Кыргызстан менен Өзбекстан суу чарбасы боюнча тажрыйба алмашышат
Суу ресурстары, айыл чарба жана кайра иштетүү өнөр жайы министринин орун басары Алмаз Жээналиев жумушчу сапар менен Өзбекстанга барып, эки өлкөнүн суу чарба тармагындагы кызматташтыгын өнүктүрүү маселелерин талкуулады. Бул тууралуу министрликтин басма сөз кызматы билдирди.
Сапардын алкагында Алмаз Жээналиев Өзбекстандын суу чарба министри Шавкат Хамраев менен жолугуп, суу ресурстарын башкаруу, тармактагы эки тараптуу кызматташтыктын учурдагы абалы жана аны мындан ары кеңейтүүнүн мүмкүнчүлүктөрү боюнча пикир алышты.
Жолугушууда өзбек тарап суу чарба тармагында заманбап илимий технологияларды колдонуу, адистерди даярдоо жана алардын кесиптик деңгээлин жогорулатуу боюнча аткарылып жаткан иштер тууралуу маалымат берди.
Ошондой эле кыргыз делегациясы Суу чарбачыларынын мектебинин, китепканасынын жана Ирригация жана суу көйгөйлөрү боюнча илимий-изилдөө институтунун лабораторияларынын ишмердүүлүгү менен таанышты.
Жолугушуунун жыйынтыгында тараптар суу ресурстарын башкаруу тармагында кызматташууну мындан ары өнүктүрүүгө, тажрыйба алмашууга жана алдыңкы ыкмаларды киргизүүгө кызыкдар экенин белгилешти.
