Кыргызстанда коомдук тамактануу тармагынан түшкөн салык 60%га өстү
Кыргызстанда коомдук тамактануу тармагынан мамлекеттик бюджетке түшкөн салыктардын көлөмү көбөйдү. Бул тууралуу Мамлекеттик салык кызматы билдирди.
Мекеменин маалыматына ылайык, 2026-жылдын январь–май айларында кафе жана ресторандар боюнча ишке ашырылып жаткан пилоттук долбоордун алкагында бюджетке 1 млрд 536,7 млн сом салык түштү.
Салык кызматынын маалыматына караганда, фискалдык программалык камсыздоого кошулганга чейин бул тармактагы орточо айлык салыктык түшүүлөр 184,2 млн сомду түзүп келген. Эсепке алуу системасы киргизилгенден кийин көрсөткүч 307,3 млн сомго чейин өсүп, өсүү темпи 166,8 пайызды түзгөн.
Мындай жыйынтык ишкерлердин ишмердүүлүгүнүн ачыктыгынын жогорулашы, акчалай эсептешүүлөрдүн толук эсепке алынышы жана көмүскө жүгүртүүнүн азайышы менен байланыштуу экени белгиленди.
Мамлекеттик салык кызматы фискалдык программалык камсыздоону киргизүү бюджеттин киреше бөлүгүн көбөйтүүгө, ишкерлер үчүн атаандаштыкта бирдей шарттарды түзүүгө жана салыктык тартипти чыңдоого жардам берип жатканын айтты.р
