Тоголок алтын кенинин башкы объектилерин кытайлык компания курат
“Кумтөр Голд Компани” Тоголок алтын кенин өздөштүрүү долбоорунун негизги өндүрүштүк объектилерин курууну кытайлык “China Nerin Engineering Co., Ltd.” компаниясына тапшырды. Компания долбоорлоодон тартып объектилерди пайдаланууга берүүгө чейинки бардык иштерди аткарат.
“Кумтөр Голд Компани” ЖАКтан билдиришкендей, ачык сынактын жыйынтыгында аталган компания алтын ылгоочу фабриканы, калдык сактоочу жайды, вахталык шаарчаны жана кенди иштетүүгө зарыл болгон башка инфраструктуралык объектилерди куруу боюнча жеңүүчү болгон.
Ишкана жетекчилиги белгилегендей, кытайлык компания курулуш иштерине гана жооп берет жана алтын казуу иштерине катышпайт. Тоголок кенин иштетүү толугу менен “Кумтөр Оперейтинг Компани” тарабынан жүргүзүлөт.
Тоголок кенин өнүктүрүү долбоору “Кумтөр Голд Компани” тарабынан өз каражатынын эсебинен каржыланууда. Долбоорду ишке ашырууда чет өлкөлүк инвестиция же насыя тартылган эмес. Кендин расмий бекитилген баланстык кору 19 тонна 928 килограмм алтынды түзөт.
