“Үй сатылат”: такталар үчүн бирдиктүү үлгү даярдалды
Бишкекте жеке турак жайларды сатуу боюнча жарыя такталары үчүн бирдиктүү дизайн иштелип чыкты. Бул тууралуу Шаар куруу жана архитектура департаментинен билдиришти.
Маалыматка ылайык, жаңы эскиздик долбоор шаардагы визуалдык тартипти камсыз кылуу жана бирдиктүү архитектуралык стилди калыптандыруу максатында даярдалган. Долбоор колдонуудагы дизайн-коддун талаптарына ылайык иштелип чыгып, шаар аймагында бирдиктүү үлгү катары киргизүү сунушталууда.
Жаңы талаптар жеке турак жай курулуш объектилерине гана тиешелүү болот. Ага ылайык, “Үй сатылат” деген маалыматтык тактанын стандарттык өлчөмү 700х400 миллиметр болуп, аны акрил материалынан даярдоо сунушталат.
Такта кочкул көк түстө, ал эми жазуулар ак түстө болушу каралган. Негизги бөлүгүндө “ҮЙ САТЫЛАТ” деген жазуу жайгаштырылып, төмөн жагында байланыш телефону жана кыскача маалымат көрсөтүлөт. Зарыл учурда орус тилиндеги “ПРОДАЕТСЯ ДОМ” деген жазууну кошууга уруксат берилет.
Ошондой эле такталарды үйдүн фасадына же тосмосуна, жакшы көрүнгөн жерге жана жерден 1,5–2,5 метр бийиктикке орнотуу сунушталган.
Шаар бийлигинин маалыматына ылайык, “Жаңы үлгүдөгү маалыматтык такталар” аттуу эскиздик долбоор жакынкы убакта тиешелүү шаардык кызматтардын кароосуна жөнөтүлөт.
